“Jaholatga qarshi ma’rifat” shiori ostida ma’naviy-ma’rifiy tadbir

Geologiya fanlari universitetida talaba-yoshlar o‘rtasida ma’naviy-ma’rifiy ishlarni yanada kuchaytirish, ularni turli yot g‘oyalar va zararli oqimlardan asrash maqsadida “Jaholatga qarshi ma’rifat” shiori ostida ma’naviy-ma’rifiy tadbir tashkil etildi.

Mazkur uchrashuvga O‘zbekiston Respublikasi Din ishlari qo‘mitasi mas’ul xodimi Abdug‘affor Qayumov tashrif buyurib, yoshlar bilan ochiq muloqot olib bordi. U o‘z so‘zida bugungi globallashuv davrida yoshlarni turli yot g‘oyalardan asrash, ularning ma’naviy immunitetini mustahkamlash, diniy savodxonlikni oshirish muhim ahamiyat kasb etishini ta’kidladi.

Tadbir davomida talaba-yoshlar o‘zlarini qiziqtirgan savollarga mutaxassis tomonidan batafsil javoblar oldilar. Muloqot jarayonida yoshlarni milliy va umuminsoniy qadriyatlarga hurmat ruhida tarbiyalash, ularning mustaqil fikrlashi hamda sog‘lom dunyoqarashini shakllantirish masalalariga alohida e’tibor qaratildi.