“Yangi-Angren IES” AJda Navro‘z: milliy an’analar va jamoaviy hamjihatlik uyg‘unligi

“Yangi-Angren IES” aksiyadorlik jamiyatida “Navro‘zni ulug‘lash – insonni ulug‘lashdir!” degan ezgu g‘oya asosida bayram tadbiri ko‘tarinki ruhda tashkil etildi. Milliy qadriyatlarimizni ulug‘lovchi ushbu shodiyona korxona ishchi-xodimlarini birlashtirib, samimiy muhitda o‘tdi.

Tadbir davomida qadimiy an’analarimizdan biri bo‘lgan sumalak sayli tashkil etilib, xodimlar ishtirokida sumalak tayyorlandi. Bu jarayon o‘ziga xos mehr-oqibat, hamjihatlik va birdamlik timsoli sifatida barchaga bayramona kayfiyat ulashdi.

Shuningdek, osh chempionati o‘tkazilib, unda turli bo‘lim va sex jamoalari o‘z mahoratlarini namoyon etdilar. Har bir jamoa milliy taomimiz – oshni tayyorlashda o‘ziga xos uslub va did bilan qatnashib, hakamlar va tomoshabinlar e’tirofiga sazovor bo‘ldi.

Bayram dasturida turli xil an’anaviy marosimlar, milliy urf-odatlar aks etgan sahna ko‘rinishlari, kuy-qo‘shiqlar va raqslar namoyish etildi. Ushbu chiqishlar Navro‘zning asl mohiyatini – yangilanish, mehr-oqibat va inson qadri ulug‘lanishini yana bir bor yodga soldi.

“Yangi-Angren IES” AJda tashkil etilgan Navro‘z bayrami o‘yin-kulgu, quvonch va yuqori kayfiyatga boy tarzda o‘tdi. Bunday tadbirlar jamoa o‘rtasida ahillikni mustahkamlash, milliy qadriyatlarimizni keng targ‘ib etishda muhim ahamiyat kasb etadi.