“Qashqadaryo parmalash ishlari” AJ xodimlarining murojaati kasaba uyushmalari nazoratiga olindi

2025-yil 28-iyul kuni “Qashqadaryo parmalash ishlari” AJda faoliyat yurituvchi bir guruh xodimlar O‘zbekiston kasaba uyushmalari Federatsiyasiga jamoaviy murojaat yo‘lladi. Unda ish haqlarining o‘z vaqtida to‘lanmaganligi hamda mehnat shartnomalariga oid muammolar ko‘tarilgan.

Mazkur murojaat yuzasidan O‘zbekiston energetika, neft-gaz va geologiya xodimlari kasaba uyushmasi Respublika kengashi mas’ul xodimlari joyiga chiqib, bevosita ishchi-xodimlar va korxona rahbariyati ishtirokida o‘rganish olib bordi. Natijada korxonada 1,85 milliard so‘m miqdorida ish haqi qarzdorligi mavjudligi aniqlandi. Jamiyat rahbariyatiga ishchi-xodimlarning oylik ish haqlarini o‘z vaqtida to‘liq to‘lash bo‘yicha ko‘rsatma kiritildi.

Shuningdek, murojaatchilarning ayrim talablarini ko‘rib chiqish huquqni muhofaza qilish organlari vakolatiga kirishi tushuntirildi. Mehnat shartnomalarini bekor qilish jarayonida mehnat qonunchiligiga qat’iy rioya etilishi zarurligi alohida qayd etildi.

Jamiyat rahbariyatiga ishchi-xodimlarga ish haqlarini o‘z vaqtida va to‘liq to‘lanishini ta’minlash, shuningdek, ko‘rilgan choralarning natijalari haqida tarmoq kasaba uyushmasi Respublika kengashini xabardor qilish yuzasidan Mehnat inspeksiyasi tomonidan rasmiy ko‘rsatma xati taqdim etildi.

O‘rganishlar natijasiga ko‘ra, 2025-yil 12-avgust kuni ish beruvchi tomonidan 202 million so‘m, 15-avgust kuni esa 523 million so‘mlik ish haqi qarzdorligi qoplab berildi. Qolgan qarzdorlikni bartaraf etish bo‘yicha choralar ko‘rilayotgani bildirildi.

Kasaba uyushmalari xodimlarning mehnat huquqlarini himoya qilishni o‘z nazoratiga oldi.