Андижонда «Тежамкор ва қайта тикланувчи энергия» жихозлари Республика ярмаркаси бўлиб ўтди

28 октябрь куни Андижон шаҳрида Президентнинг 2019 йил 22 августдаги «Иқтисодиёт тармоқлари ва ижтимоий соҳанинг энергия самарадорлигини ошириш, энергия тежовчи технологияларни жорий этиш ва қайта тикланувчи энергия манбаларини ривожлантиришнинг тезкор чора-тадбирлари тўғрисида»ги қарори ижроси юзасидан семинар тарзидаги давра суҳбати ўтказилди.

Ярмаркада Ўзбекистон Республикаси Энергетика вазирлиги департамент директори Музаффар Ҳакимов ва Андижон вилояти ҳокимининг биринчи ўринбосари Абдужаббор Эгамбердиев  сўзга чиқиб, ҳозирги кунда долзарб бўлган ёқилғи-энергетика ресурсларидан оқилона ва самарали фойдаланиш  масалалари юзасидан ўз фикрларини билдирди.

Давра суҳбатида маълум қилинишича, «Андижон ҳудудий электр тармоқлари корхонаси» акциядорлик жамияти томонидан вилоятдаги 611 минг аҳоли хонадонлари ва 15 мингдан ортиқ корхона ва ташкилотларга электр энергияси етказиб берилмоқда.

2019 йилнинг 9 ойи давомида истеъмолчиларга 2 млрд. 800 млн. кВт.соат электр энергияси етказиб берилган бўлса, аввалги йилларнинг мос даврида етказиб берилган электр энергияси миқдори 2 млрд. 200 млн. кВт.соатни ташкил этди.

Хусусан, сўнгги тўрт йил давомида вилоятда электр энергияси истеъмоли деярли 30 фоизга ортди. Электр энергияси истеъмолининг ортиши билан тармоқларда ва жисмонан эскирган электр жиҳозлардаги йўқотишлар ҳам ортиб борган. Электр тармоқларидаги йўқотишларни 10-6-0,4 кВ кучланишли тармоқлардаги  жисмонан эскирган симлар ва ортиқча юклама билан ишлаётган трансформатор пунктлари ҳамда маҳаллаларда янги қурилган аҳоли хонадонларига тортилган қўлбола 0,4 кВ кучланишли тармоқлар ташкил қилган.

Ушбу йўқотишларнинг олдини олиш мақсадида Ўзбекистон Республикаси Президентининг 2016 йил 23 ноябрдаги ПҚ-2661 сонли «2017-2021 йилларда паст кучланишдаги электр узатиш тармоқларини реконструкция ва модернизация қилиш давлат дастури» асосида 2017-2019 йилларда вилоятда 1400 км 10-0,4 кВ кучланишли электр узатиш тармоқлари ва 10/0,4 кВ кучланишли 650 дона трансформатор пунктлари янги қурилиб, ҳудудларда ортиқча юклама билан ишлаётган трансформатор пунктлари юки енгиллаштирилди.

Биргина 2019 йил давомида юқори кучланишли тармоқларда ортиқча юкламада ишлаётган 4 дона куч трансформаторларини катта қувватлисига алмаштириш эвазига 300 минг кВт соат электр энергияси, 31 дона 10/0,4 кВ кучланишли ортиқча юклама режимида ишлаётган трансформаторларни катта қувватлисига алмаштириш ҳисобига 850 минг кВт.соат электр энергияси иқтисод қилинди.

Электр энергиясидан истеъмолчилар томонидан оқилона фойдаланиш мақсадида аҳоли ва юридик истеъмолчиларга ўрнатилган электр ҳисоблагичларни замонавий, масофадан автоматик бошқарилувчи АСКУЭ тизимига уланган электрон ҳисоблагичларга алмаштириш ишлари олиб бориляпти.

2018 йил 1 январдан бошлаб «Андижон ҳудудий электр тармоқлари» АЖ тасарруфидаги бўлимлар, шаҳар ва туман электр таъминоти корхоналари биноларида 19 дона қуёш сув иситкичлари ўрнатилди. Жамият тасарруфидаги барча бино ва иншоотлардаги чўғланма лампалар тўлиқ энергия тежамкор лампаларга  алмаштирилди ва бунинг натижасида йил давомида 400 минг кВт соат электр энергиясини иқтисод қилишга эришилмоқда.

Вилоятнинг 16 та шаҳар-туман иқтисодий тармоқлари, ижтимоий соҳа  ва маиший истеъмолчиларда  мавжуд 53762 дона чўғланма лампаларни энерготежамкор лампаларга алмаштириш натижасида йил давомида 46 млн кВт соат электр энергиясини иқтисод қилинди.

«Андижон ҲЭТК» АЖ таркибига кирувчи корхона ва ташкилотлардан 200 нафардан ортиқ ёшлар ўз кўргазмалари билан иштирок этишди. Машинасозлик институти талабалари томонидан тайёрланган кўча чироқларини ёритишнинг янги тақдимот намойиши, тадбир иштирокчиларида катта қизиқишларни уйғотиш билан алоҳида аҳамиятга эга бўлди.

Бундан ташқари шу куннинг ўзида ОАВ ва Блоггерлар учун Давра суҳбати бўлиб ўтди.

«Андижон ҲЭТК» АЖ касаба уюшма қўмитаси