“Hududgaztaʼminot” AJ xodimlari ishtirokidagi Zakovat intellektual oʻyinining final bosqichi boʻlib oʻtdi

“Hududgaztaʼminot” AJ va uning tizim korxonalarida yoshlar oyligi doirasidagi tadbirlar davom etmoqda. 29-iyun kuni Toshkentdagi “Zakovat arena”da 30-iyun – Yoshlar kuni munosabati bilan “Hududgaztaʼminot” AJ va uning hududiy filiallaridagi ishchi-xodimlar oʻrtasida Zakovat intellektual oʻyinining final bosqichi oʻtkazildi. Mingdan ortiq gazchilar, yuzlab yoshlar ishtirokida oʻtgan hududiy saralash bosqichida gʻolib chiqqan jamoalar sovrinli oʻrinlar uchun bahs olib bordi.

Mazkur tadbirda “Hududgaztaʼminot” AJ Boshqaruv raisi Bahodir Eshmuratov tizimda faoliyat olib borayotgan yoshlar bilan uchrashuvi ham boʻlib oʻtdi. Jamiyat rahbari yoshlarni bayram bilan tabriklab, tizimda yosh kadrlarni qoʻllab-quvvatlash samarali yoʻlga qoʻyilgani haqida alohida toʻxtalib oʻtdi. Soha rivojida yoshlarning oʻrni nihoyatda katta ekani alohida qayd etildi.

Musobaqada “Zakovat” NNT prezidenti Abdurasul Abdullayev tomonidan tayyorlangan savollar xodimlarning turli sohalarga oid bilimlarini sinovdan oʻtkazdi. Murosasiz kechgan bahslardan keyin sovrindorlar aniqlandi:

1-oʻrin: “Hududgaztaʼminot” AJ Ijro apparati

2-oʻrin: “Hududgaz Surxondaryo” GTF

3-oʻrin: “Hududgaz Qashqadaryo” GTF

Sovrinli oʻrinlarni qoʻlga kiritgan jamoalarga “Hududgaztaʼminot” AJ birlashgan kasaba uyushmasi qo’mitasi tomonidan maxsus kubok, medal va pul mukofotlari topshirildi.

Musobaqa yakunida B. Eshmuratov xodimlar intellektual salohiyatini oshirishga xizmat qiladigan Zakovat oʻyinlari soha vakillari orasida muntazam oʻtkazib turilishini taʼkidladi. Shu bilan birga Jamiyat rahbari yoshlarni yana bir bor bayram bilan tabriklab, kelgusidagi faoliyatlariga muvaffaqiyatlar tiladi.