“O‘zbek geologiya qidiruv” AJ kasaba uyushma tashkilotining hisobot-saylov Konferensiyasi bo‘lib o‘tdi

Joriy yilning 14-mart kuni “O‘zbek geologiya qidiruv” AJ Ijro apparatida “O‘zbek geologiya qidiruv” AJ kasaba uyushma tashkilotining hisobot-saylov konferensiyasi bo‘lib o‘tdi. Unda “O‘zbek geologiya qidiruv” AJ boshqaruv raisi – Sh.Alimov, Oʻzbekiston energetika, neft-gaz va geologiya xodimlari kasaba uyushmasi Respublika Kengashi Moliya bo‘limi mudiri – Z.Ibragimova va Ijtimoiy himoya bo‘limi mudiri – R.Jo‘rayev, “Oʻzbek geologiya qidiruv” AJ Kasaba uyushmasi qoʻmitasi raisi M.Iminov hamda hududlardan saylangan delegatlar ishtirok etishdi.

Hisobot-saylov konferensiyasi kun tartibidan o‘rin olgan boshlangʻich kasaba uyushmasi qoʻmitasining 2022-yil maydan 2025-yil fevralgacha bo‘lgan davr mobaynidagi faoliyati yakunlari va xodimlarning ijtimoiy-iqtisodiy huquq va manfaatlarini himoya qilish, kelgusidagi vazifalar borasidagi hisobot-saylov davrdagi faoliyati sarhisob qilindi. Shuningdek, boshlang‘ich kasaba uyushmasi tashkiloti taftish komissiyasining hisoboti tinglandi. Shundan so‘ng kun tartibidagi asosiy masala “O‘zbek geologiya qidiruv” AJ kasaba uyushmasi qo‘mitasi raisi va o‘rinbosarini saylash jarayoni o‘tkazildi. Saylov jarayoni yashirin ovoz berish tartibida tashkil qilinib, delegatlar tomonidan berilgan umumiy ovozlar soni bo‘yicha bir ovozdan M.Iminov nomzodi “O‘zbek geologiya qidiruv” AJ kasaba uyushmasi qo‘mitasi raisi lavozimiga, I.Rahimov nomzodi esa kasaba uyushmasi qo‘mitasi raisi o‘rinbosari vazifasiga saylandi. Bundan tashqari boshlangʻich kasaba uyushmasi qoʻmitasi a’zolari va taftish komissiyasi a’zolari saylandi.

Kun tartibidan o‘rin olgan boshqa masalalar ham delegatlar ishtirokida ko‘rib chiqildi. So‘zga chiqqanlar hisobot davrida xodimlarni qo‘llab-quvvatlash bo‘yicha qilingan ishlarni e’tirof etishdi. Yangi saylangan qo‘mita raisi va a’zolari oldida turgan kelgusidagi ustuvor vazifalar belgilab olindi. Bir so‘z bilan aytganda konferensiya ko‘tarinki ruhda bo‘ldi.