МДҲ мамлакатларининг атом энергия касаба уюшмалари вакилларининг видео конференцияси бўлиб ўтди

15 декбр куни видеоконференцалоқа форматида меҳнатни муҳофаза қилиш соҳасида ўзаро тажриба алмашишга бағишланган халқаро конференция бўлиб ўтди. Россия атом энергетикаси ва саноат ходимлари касаба уюшмаси ташаббуси билан ташкил этилган тадбирда Ўзбекистон, Беларус ва Қозоғистон касаба уюшмалари ташкилотлари вакиллари иштирок этди.

Конференцияни табрик сўзи билан Россия атом энергетикаси ва саноат ходимлари касаба уюшмаси раиси Игор Фомичев очди. Россия Федерацияси тармоқ касаба уюшмаси раиси меҳнатни муҳофаза қилиш соҳасидаги муаммоларни ҳал қилишнинг ўзаро мақбул усулларини излаш бўйича ижтимоий шерикларнинг турли давлатларининг тажриба алмашиши ва ўзаро ҳамкорлиги долзарблигини таъкидлади.

Конференциянинг асосий вазифалари қуйидагилар бўлди:

• меҳнатни муҳофаза қилиш соҳасида хавфсизлик маданиятини кўтаришга эътиборни кучайтириш ва меҳнат муносабатлари иштирокчилари ўртасида конструктив мулоқотни талаб қилувчи ижтимоий шерикларнинг ўзаро ҳамкорлиги тизимини йўлга қўйиш;
• ходимларнинг ҳаёти ва соғлиғини сақлаш учун меҳнатни муҳофаза қилиш соҳасида ижтимоий шериклар ўртасидаги ўзаро ҳамкорликнинг самарадорлигини ошириш йўналишлари ва усулларини таклиф этиш;
• хавфсизлик даражасига таъсир кўрсатган шартлар, ҳаракатлар, ҳодисалар, ёндашувлар, меъёрий-ҳуқуқий базани аниқлаш мақсадида, 5 йил давомида ишлаб чиқаришдаги шикастланишлар динамикасини таҳлил қилиш.

Конференция давомида иштирокчилар РОСАТОМ ташкилотларида меҳнатни муҳофаза қилиш ҳолати, қурилаётган хорижий атом энергетика объектларида хавфсизликни таъминлаш тўғрисидаги маълумотларни тингладилар, меҳнатни муҳофаза қилиш соҳасида назоратни ташкил этишда янги ёндашувларни амалий қўллаш масалаларини муҳокама қилдилар.

Ўзбекистон энергетика, нефт-газ ва геология ходимлари касаба уюшмаси Республика кенгаши матбуот хизмати